Անգամ քաղաքավարության տարրական կանոններին չէր հետեւում. ակտիվիստը` Տարոն Մարգարյանի հետ հանդիպման մասին

Տեղեկությունները, թե Տարոն Մարգարյանը երեկ այցելել է նստացույց անող ակտիվիստներին, ապատեղակատվություն է: Այս մասին այսօր Yerkir.am-ի հետ զրույցում հայտնեց Երեւանի քաղաքապետարանի առջեւ նստացույց հայտարարած երեք երիտասարդներից Վահագն Մինասյանը: Նա պատմեց, որ երբ Տարոն Մարգարյանը քաղաքապետարանի հետնամուտքով շենք մտնելիս է եղել ինքը «Վերջ անպատժելիությանը» գրությամբ պաստառով վազելով գնացել է Տարոն Մարգարյանին ընդառաջ:

«Նա քայլելով հարցրեց` ո՞նց եք, ասացի` վատ: Նա ասաց` Ձեզ առաջարկել եմ բարձրանալ վերեւ, նստել բանակցությունների սեղանի շուրջ: Նա այդ ընթացքում քայլում էր, անգամ քաղաքավարության տարրական կանոններին չէր հետեւում` չսպասելով, որպեսզի ես պատասխանեմ իր առաջարակին կամ հարցերին: Ես նրան ասել եմ, որ նման առաջարկություն մենք չենք ստացել»,- երեկվա հանդիպման մանրամասները ներկայացրեց ակտիվիստը:

Նա նաեւ տեղեկացրեց, որ չեն պատրաստվում Տարոն Մարգարյանի հետ փակ սենյակներում բանակցություններ վարել: Վահագն Մինասյանն առաջարկում է Տարոն Մարգարյանին` իջնել իր աշխատասենյակից եւ այսօր` ժամը 17:00-ին հանդիպել իրենց հետ ու ասել իր ասելիքը:

Մանրամասները` Yerkir.am-ի տեսանյութում: