Դսեղի միջնադարյան գերեզմանոցի հուշակոթողը կվերականգնվի

Հունիսի 18-ին ՀՀ մշակույթի նախարար Հասմիկ Պողոսյանն այցելել էր Դսեղ: Դսեղի գյուղապետ Նորիկ Քոչարյանը տեղեկացրել էր նախարարին, որ գյուղի միջնադարյան գերեզմանոցում գտնվող քառակողմ հուշաքարը 18 աստիճանով թեքվել է իր առանցքից:

Yerkir.am-ը ՀՀ մշակույթի նախարարությունից հետաքրքրվեց, թե ի՞նչ քայլեր է պատրաստվում իրականացնել ՀՀ մշակույթի նախարարությունը հուշակոթողի վերականգնման համար:

Մեր հարցմանն ի պատասխան` նախարարության պատմության եւ մշակույթի հուշարձանների պահպանության գործակալությունից նշեցին, որ նախարարը հանձնարարել է իրականացնել հուշակոթողի վերականգնման եւ գիտանախագծային փաստաթղթերի կազմման աշխատանքները, որոնք կֆինանսավորվեն պետական բյուջեի «Հուշարձանների հրատապ ուսումնասիրում, ամրակայում, վերականգնում» կետի համաձայն:

Տեղում ուսումնասիրություններ կատարելու եւ գործընթացը կազմակերպելու նպատակով Դսեղ են գործուղվել համապատասխան մասնագետներ: