Պռոշյանցիները գյուղապետ են ընտրում

Կոտայքի մարզի Պռոշյան գյուղում այսօր գյուղապետի արտահերթ ընտրություններ են: Ընտրությանը մասնակցում է երեք թեկնածու' ՀՅԴ անդամ Վովա Սահակյանը, ՀՀԿ անդամ Արթուր Մուրադյանը եւ անկուսակցական Ալեքսան Ալեքսանյանը: Երեք թեկնածուներն էլ ինքնաառաջադրված են:

Նկատվում է ընտրողների աննախադեպ ակտիվություն: Տեղամասերի մուտքի մոտ ընտրողների կուտակումներ են: Համայնքի երկու' 26/1 եւ 26/32 տեղամասերում ժամը 11-ի դրությամբ 3991 ընտրողից ընտրել է մոտ 1100-ը:

Նկատվում է մեծ ակտիվություն դիտորդների եւ լրատվամիջոցների կողմից: Ընտրության բնականոն ընթացքն ապահովելու համար մասնակցում են նաեւ մեծաթիվ ոստիկաններ:

Մինչ այս պահը միջադեպեր չեն գրանցվել: Սակայն, հայկական սովորության համաձայն, կարելի է տեսնել ընտրությանը եկած 50-ից ոչ մեծ տարիքի ընտրողների, ովքեր բողոքում են տեսողությունից եւ պահանջում, որ իր հետ եկած ուղեկիցը «օգնի» քվեարկել:

Պռոշյանում արտահերթ ընտրություններ նշանակվեցին այն բանից հետո, երբ գյուղապետարանի մոտ ապրիլի 2-ին սպանվեց երկարամյա գյուղապետ, դաշնակցական Հրաչ Մուրադյանը: