17 տարի գյուղապետ աշխատած ՀՀԿ-ականը կրկին գյուղապետ դառնալու ախորժակ ունի

Կոտայքի մարզի Զովունի գյուղի ՏԻՄ ընտրություններում միմյանց դեմ պայքարում է երկու թեկնածու` գործող գյուղապետ Սերժիկ Ավետիսյանը, ով գյուղապետ է 1999-ից, և նրան սատարում է ՀՀԿ-ն, և անկուսակցական, ինքնաառաջադված Վրույր Սիմոնյանը: Yerkir.am-ի հետ զրույցում Վրույր Սիմոնյանն ամփոփեց քարոզարշավը` ասելով, որ բակ առ բակ, փողոց առ փողոց հանդիպել է գյուղացիների հետ, լսել նրանց հոգսերի, խնդիրների մասին:

«Բայց իմ մրցակցի կողմից ոչ թե քարոզարշավ է իրականացվում, այլ վայրագություն: Ինձանից հետո մտնում են բակերը, լծակներն օգտագործելով` ահաբեկում մարդկանց, մեկին ասում է` հող կվերցնեմ ձեռքիցդ, մեկին ասում է` հող կտամ: Անգամ 5 հազար դրամ ընտրակաշառքի խոսակցություններ կան»,- ասաց մեր զրուցակիցը:

Միաժամանակ, անկուսակցական թեկնածուն չի կարծում, որ մրցակցի վարչական լծակների կիրառումը նվազեցնում է իր` ընտրվելու շանսերը:

Ինչ վերաբերում է գյուղի խնդիրներին, Վրույր Սիմոնյանը մատնանշեց ճանապարհների վատ վիճակը, աղբահանությունը, խմելու և ոռոգման ջրի հետ կապված խնդիրները: