Ռուսական ֆիլմերի օրեր` ″Ոսկե ծիրան″-ի շրջանակներում

Հուլիսի 7-ին կմեկնարկի «Ոսկե ծիրան» 10-րդ միջազգային կինոփառատոնը:

Լրագրողների հետ հանդիպման ժամանակ կինոփառատոնի հիմնադիր-տնօրեն Հարություն Խաչատրյանը նշեց, որ այս տարի ավելացել է մեկ ծրագիր, որը կոչվում է «Ռուսական ֆիլմերի օրեր»: Ըստ նրա` ծրագիրն իրականացվում է Ռուսաստանի մշակույթի նախարարության եւ «Կինոֆեստ» պրոդյուսերական կենտրոնի հետ համատեղ:

«Ծրագրում կներկայացվեն վերջին շրջանում մրցանակների արժանացած լավագույն ռուսական ֆիլմերը, օրինակ` Սոչիի «Կինոտավր» փառատոնի մի քանի հաղթող ֆիլմեր: Ծրագիրը կմեկնարկի հուլիսի 9-ին` Բորիս Խլեբնիկովի «Քանի դեռ գիշերը մեզ չի բաժանել» ֆիլմով»:

Նա ասաց նաեւ, որ այս տարի հուլիսի 8-12-ը «Նաիրի» կինոթատրոնում վարպետության դասեր կանցկացնեն անվանի կինոգործիչներ Մարգարեթե Ֆոն Թրոթան, Պավել Ֆիննը, Թուե Սթին Մյուլլերը, Յոս Ստելինգը եւ Գոդֆրի Ռեջիոն, ով համաձայնել է երիտասարդների հետ հանդիպում ունենալ նաեւ «Թումոյում»: