Մղկտացեք, հեսա մի ամիս հետո էլ եք մղկտալու. ինքնասպան եղած երիտասարդի խոսքերը

Երեկ երեկոյան` ժ. 2:50-ի սահմաններում, ոստիկանության Հրազդանի բաժնում ահազանգ է ստացվել, որ  Կոտայքի մարզի Քաղսի գյուղի կեղտամաքրման կայանում մարդ է կախվել: Ոստիկանության օպերատիվ խումբը պարզել է,  որ կայանի կաթսայատան երկաթյա ձողից կախված անձը 29-ամյա Զոհրաբ Հովակիմյանն է: Ոստիկանությունից yerkir.am-ին հայտնեցին, որ, ըստ նախնական վարկածի, երիտասարդն ինքնասպան է եղել:  Փաստի առթիվ Կոտայքի մարզի քննչական բաժնում նյութեր են նախապատրաստվում:

Yerkir.am-ի տեղեկություններով` մահացած երիտասարդը Հրազդան քաղաքի բնակիչ էր, ամուսնացած էր, ուներ երկու երեխա: Դեպքի օրը Զոհրաբը զանգահարել է հորը և ասել, թե իբր իր «Nissan» մակնիշի ավտոմեքենան վթարի է ենթարկվել, այն տանում է նորոգման և խնդրել է հորը` այդ մասին մորը ոչինչ չասել: Սակայն հետո երիտասարդին գտել են կախված:

Մեր  տեղեկություններով` ինքնասպան եղած երիտասարդը սոցիալապես բարվոք վիճակում էր, ընտանեկան խնդիրներ չուներ: Սակայն վերջին մեկ ամսվա ընթացքում հարազատները նրա մոտ տարօրինակ վարքագիծ են նկատել: Դեպքից մեկ ամիս առաջ էլ երկարատև հիվանդությունից մահացել էր Մոսկվայում բնակվող նրա մորաքրոջ աղջիկը: Վերջինիս  հուղարկավորության ժամանակ հարազատի կորուստը սգող հարազատներին Զոհրաբն  ասել է. «Մղկտացեք, հեսա մի ամիս հետո էլ էք մղկտալու»: Մահացածի այս խոսքերի իմաստը հարազատները միայն երեկ են հասկացել: