Հովիկ Աբրահամյանն ու վարչապետը պայքարում են, որ ի՞նչ անեն. Գալուստ Սահակյան

Արդեն տեղեկացրել ենք, որ երեկ երեկոյան Աշոտ Սուքիասյանը`Արարատյան հայրապետական թեմի առաջնորդ Նավասարդ Կճոյանի սանիկը, նամակ է ուղարկել ՀՀ դատախազություն եւ «Հետքի» խմբագրություն`տեղեկացնելով, որ ինքն է վարչապետի եւ արքեպիսկոպոսի անունից օֆշորային գոտում ընկերություններ գրանցել` առանց նրանց գիտության:

Տեղեկատվությանը, պարզվում է, ԱԺ ՀՀԿ խմբակցության ղեկավար Գալուստ Սահակյանը չէր տիրապետում: ԱԺ-ում լրագրողների հետ զրույցում նա հայտարարեց, որ «չի հավատում էդ շոուներին, որ կազմակերպում են»: Լրագրողների դիտարկմանը` շոուն ո՞րն է, Սահակյանն արձագանքեց` չի կարծում, որ «վարչապետը խնդիր պիտի ունենար օֆշորային գոտիներում գումար պահելու հետ»: Լրագրողների դիտարկմանը, թե Սուքիասյանի ինքնախոստովանությունը շոու չէ՞ր, ՀՀԿ խմբակցության ղեկավարը պատասխանեց, որ դա բանկային համակարգի հետ է կապված, ինքը բանկերի հետ որեւէ առնչություն չի ունեցել, որ իմանա`միամիտ է, ոչ միամիտ:

Օֆշորների հետ կապված այս ողջ պատմությունը, ըստ Սահակյանի, հերյուրանք է: Իսկ թե ով է հերյուրանքի հեղինակը, ՀՀԿ խմբակցության ղեկավարը չգիտի. «Ես արդեն գործակալ ե՞մ»: Լրագրողներից մեկը նշեց, որ, ըստ շրջանառվող տեղեկությունների, դրանք արդյունք են ԱԺ նախագահ Հովիկ Աբրահամյանի եւ վարչապետ Տիգրան Սարգսյանի միջեւ հարաբերությունների, ու դրանց հեղինակը Հովիկ Աբրահամյանն է: Սահակյանը հակադարձեց. «Ես այն գործիչը չեմ, որ ստեղ կանգնեմ` իրար հետ համատեղ բամբասենք, ռեալ հարցեր տվեք: Այսինքն` Հովիկ Աբրահամյանն ու վարչապետը պայքարում են, որ ի՞նչ անեն»: