Պատանի ըմբիշները պատրաստ են Եվրոպայի առաջնությանը

Մոտնենեգրոյի Բար քաղաքում հունիսի  17-21-ը կանցկացվի ըմբշամարտի Եվրոպայի պատանեկան առաջնությունը:

Աբովյան քաղաքում ազատ ոճային հայ ըմբիշներն անցկացնում են իրենց եզրափակիչ պարապմունքները առաջնությանը մեկնելուց առաջ:

Այս առաջնությունը  մի փոքր ավելի  բարդ է լինելու նրանց համար, քանի որ գոտեմարտելու են նոր կանոններով: Սակայն տղաները չեն ընկճվում և մարզվում են մեծ եռանդով:

Yerkir.am-ը ներկա է եղել ըմբիշների  վերջին մարզմանը և զրուցել  հավաքականի գլխավոր մարզիչ Արշակ Հայրապետյանի հետ:

«Տղաների ընդհանուր պատրաստվածությունը համարում եմ լավ: Ոչ մեկը քաշի խնդիր չունի: Վնասվածքներ` նույնպես: Երկրորդ հավաքից սկսած` պարապել ենք նոր կանոնների համաձայն: Ճիշտ է` տղաներն ընտելացել են փոփոխությանը, սակայն մի քանի միջազգային մրցումներից հետո միայն կարելի է հասկանալ նոր կանոնադրության նրբությունները:

Իրականում ակնկալիքները շատ են: Չեմ ասում բոլորը կվերադառնան մեդալներով, սակայն առանձնացնել որևէ մեկին նույնպես չեմ ցանկանա:

Կան ըմբիշներ, ովքեր առաջին անգամ են մասնակցելու Եվրոպայի առաջնությանը, սակայն կա ևս մեկ մարզիկ` Սարգիս Հովսեփյանը (76 կգ), ով ընդհանրապես առաջին անգամ է մասնակցելու միջազգային մրցաշարի: Նրանից նույնպես ակնկալիքները շատ մեծ են»,- նշեց մարզիչը:

Ազատ ոճի ըմբշամարտի Հայաստանի պատանեկան հավաքականն այսօր երեկոյան կմեկնի Մոնտենեգրո: