Կաննի կինոփառատոնի գլխավոր մրցանակը շնորհվեց միասեռականների սիրո մասին ֆիլմին

Կաննի 66-րդ կինոփառատոնն ավարտվեց սենսացիայով. փառատոնի գլխավոր մրցանակը շնորհվեց ֆրանսիացի կինոռեժիսոր Աբդելատիֆ Քեշիշին` «Ադելի կյանքը» ֆիլմի համար, որը պատմում է միասեռականների սիրո մասին:

Ռեժիսորի խոսքով` ինքը պարզապես ցանկացել է գեղեցիկ սիրո պատմություն ցույց տալ: Կաննի կինոփառատոնի հանդիսատեսների մեծ մասը շոկի մեջ է եղել երկու աղջիկների սիրո մասին պատմող ժապավենից:

Փառատոնի հաջորդ` իր կարևորությամբ երկրորդ մրցանակը շնորհվեց ամերիկացի եղբայրներ Իտան և Ջոել Կոեններին` «Լյուին Դեւվիսի ներսում» ֆիլմի համար: 

Ժյուրիի մրցանակը ստացավ ճապոնացի ռեժիսոր Հիրոկազ Կորեդան իր «Ինչպիսին հայրն է, այնպիսին  էլ որդին է» ֆիլմի համար:

Լավագույն ռեժիսորական աշխատանքի համար տրվող մրցանակը շնորհվեց մեքսիկացի ռեժիսոր Ամատ Էսկալանտեին` «Հելի» ժապավենի համար:

Լավագույն սցենարի համար մրցանակի արժանացավ չինացի ռեժիսորի «Մեղքի հպումը» ֆիլմը:

Կաննի 66-րդ կինոփառատոնի լավագույն դերասաններ ճանաչվեցին 76-ամյա ամերիկացի դերասան Բրյուս Դերնը և ֆրանսիացի դերասանուհի Բերենիս Բեժոն: