Դուք պետք է վայելեք, իսկ իշխանությունները զբաղված են տքնաջան աշխատանքով. Տիգրան Սարգսյան

Այսօր ԱԺ-ում կառավարության ծրագրի ընդունումից հետո վարչապետ Տիգրան Սարգսյանը զրուցեց լրագրողների հետ:

Yerkir.am-ը վարչապետ Տիգրան Սարգսյանից հետաքրքրվեց, թե արդյո՞ք գազի թանկացումը, որն անդրադառնալու է այլ ոլորտների վրա, սոցիալական բունտի կհանգեցնի: «Մեղմ ասած` հնարավո՞ր է իշխանությունները հանգիստ չվալեն իշխանության այս 4-5 տարիները»,- հարցրեց մեր թղթակիցը:

«Դուք պետք է վայելեք այս 4-5 տարիները, ժողովուրդը պետք է վայելի, իսկ իշխանությունները զբաղված են նվիրական, քրտնաջան աշխատանքով, եւ եթե իշխանությունների մեջ կան մարդիկ, որոնք այդպիսին չեն, մենք պետք է ձերբազատվենք նրանցից ձեր միջոցով»,- հայտարարեց Տիգրան Սարգսյանը:

Հետաքրքվեցինք նաեւ, թե ի՞նչ միջոցներով է կառավարությունը սուբսիդավորելու գազի սակագնի 30 տոկոսը: «Երեսուն տոկոս նվազեցումը, որի մասին ես պաշտոնական նամակ եմ ուղարկել Հանրային ծառայությունները կարգավորող հանձնաժողովի նախագահին, գտնվում է մեր բանակցային գործընթացի մեջ, եւ դա կարեւորագույն կետերից մեկն է: Այն պահին, երբ մենք համաձայնության կգանք մեր ռուսաստանցի գործընկերների հետ, թե ինչպես ենք այդ 30 տոկոսը կոմպենսացնելու, մենք ձեզ տեղյակ կպահենք: Այս պահի դրությամբ քննարկվում են մի քանի տարբերակներ»,- նշեց Տիգրան Սարգսյանը:

Թե ի՞նչ տարբերակներ են քննարկվում, վարչապետը չասաց, քանի որ բանակցային գործընթացը դեռ շարունակվում է: