Գաղջ մթնոլորտ ծնող կառավարության գալիք 5 տարիների տեսլականը

ԱԺ-ում երեկ քննարկման դրվեց ՀՀ կառավարության ծրագիրը: 2013-2017 թթ. ծրագիրն առաջարկում է Հայաստանի մարդկային կապիտալի զարգացում, ներմուծման նկատմամբ արտահանման աճի առաջանցիկ տեմպերի ապահովում, նվազագույն աշխատավարձի մակարդակի առնվազն կրկնապատկում, 100 հազարից ավելի նոր աշխատատեղերի ստեղծում և այլն:

Այսօր լրագրողների հետ հանդիպման ժամանակ կառավարության ծրագրի վերաբերյալ իր մտահոգությունները հայտնեց ԱԺ ՀՅԴ խմբակցության պատգամավոր Արծվիկ Մինասյանը: Ըստ նրա` սա այն հազվագյուտ փաստաթղթերից է, որն անորոշություն է պարունակում, որն իր մշուշոտ և անորոշ ձևակերպումներով ապագա չունի: «Այս ծրագրն այդպես էլ չի բացահայտում մեր երկրի առջև ծառացած հիմնական խնդիրները: Ծրագրային դրույթները հավանաբար վերցվել են ՀՀ նախագահի ելույթից»,- ասաց նա և հավելեց, որ իրականում ծրագրի հեղինակներն այն խորքային չեն ուսումնասիրել:

«Մեր երկրում առնվազն 500 հազար աշխատատեղ ստեղծելու անհրաժեշտություն կա: Այս կառավարությունը համարվում է կեղեքող և թալանչի, այն մեր երկրի գաղջ մթնոլորտի առաջին սերմանողներից է»:,- հայտարարեց պատգամավորը:

Անդրադառնալով «Արմավիա»-ի սնանկացմանը, պատգամավորը նշեց, որ եթե երկիրը չունի ազգային փոխադրող, նրա անվտանգությունը տուժելու է:

Ըստ Մինասյանի` երկրի զարգացման հիմքում պետք է դրվի բազմակենտրոն մասնագիտական զարգացումը: «Ամենամեծ վատությունը որ իշխանություններ արել են մեր ժողովրդին, հույսի սպանումն է: Կարծես, բնությունն էլ է սկսել մեզ պատժել` կարկուտի, ցրտահարության տեսքով»,- ասաց նա և հավելեց. «Այս իշխանություններից չարժե բարեփոխում ակնկալել, քանի որ նրանց միակ խնդիրը վերարտադրվելն էր: Մեր իշխանությունն ամենաթույլիկ իշխանությունն է: Վարչապետի երեկվա խոսքը ցույց տվեց, որ Հայաստանում ընտրություններ չեն լինում, այլ ընդամենը միջոցառում են»: