''Սպայկա''-ն ապահովագրված էր

«Սպայկա» ընկերությունն ապահովագրված էր. ընկերության հրդեհված տարածքում լրագրողների հետ զրույցում հայտարարեց ընկերության նախագծերի կառավարման բաժնի ղեկավար Կարեն Բաղդասարյանը` սակայն այդպես էլ չնշելով, թե կոնկրետ որ ընկերությունում է ապահովագրված եղել «Սպայկան»: Yerkir.am-ի թղթակիցը հաղորդում է, որ «Սպայկա»-ի ներկայացուցիչը նշել է, թե ապահովագրական ընկերության անունը չասելը պայմանավորված է կոմերցիոն խնդրով, իսկ հատուցման հարցը կկարգավորվի` ըստ սահմանված ընթացակարգերի:

«Սպայկա» ընկերության սառնարանային համալիրը` շուրջ 15 հազար քմ տարածք, ամբողջությամբ վնասվել է: Այն ամենամեծն էր եւ տեխնիկապես ամենահագեցածը տարածաշրջանում: Սառնարանային համալիրում եղել է մթերված կարտոֆիլ` Շիրակի եւ Գեղարքունիքի մարզերից: Ընկերությունը պատրաստվում էր ծիրանի սեզոնի բացմանը եւ այդ նպատակով մեծ քանակությամբ պլաստմասսայից եւ փայտից արկղեր են եղել տարածքում, ինչն էլ նպաստել է հրդեհի տարածմանը:

Պատճառների մասին Կարեն Բաղդասարյանը ոչինչ չի ասել, անգամ նախնական վարկածներ առաջ չի քաշել` նշելով, որ դա պետք է պարզեն մասնագետները: Ընկերությունն արդեն իսկ տարատեսակ աջակցության առաջարկություններ է ստացել, որոնք քննարկման փուլում են: