Կրիմինալն ու գողականը վերջացել են. Սամվել Բալասանյան

Աբովյան քաղաքում ԲՀԿ առաջնորդ Գագիկ Ծառուկյանի միջոցներով կառուցված Սուրբ Հովհաննես Մկրտիչ եկեղեցու օծման արարողությանը ներկա էր նաեւ Գյումրու ԲՀԿ-ական քաղաքապետ Սամվել Բալասանյանը: Yerkir.am-ը նրանից հետաքրքրվեց, թե ի՞նչ իրավիճակ է այսօր Գյումրիում: Քաղաքապետը վստահեցրեց, որ ամեն ինչ շատ լավ է, լարվածություն այլեւս չկա:

«Մենք Գյումրին վերածել ենք շինհրապարակի, քանդել ենք բոլոր փողոցները եւ ասֆալտապատում ենք»,- հայտարարեց նա:

Մեր դիտարկմանը, թե ի՞նչ եղան կրիմինալն ու գողական աշխարհը, Բալասանյանը պատասխանեց. «Էդ վերջացել է, չկա էդպիսի բան, ոչ մի վախի մթնոլորտ: Դեպք է` լինում է, ուշադրություն պետք չէ դարձնել: Գյումրին փոխվելու է, լավ է լինելու»:

Հարցին ի պատասխան, թե` Վարդան Ղուկասյանի՞ց էր գալիս այդ ամենը, Գյումրու գործող քաղաքապետը հայտարարեց, որ պետք չէ անձերից խոսել: Դիտարկմանը, թե Ղուկասյանին «գողական» որակումներ էին տալիս, Բալասանյանը չպատասպանեց, հորդորեց հարցն ուղղել նրանց, ով Ղուկասյանին այդպես ենորակել: «Ճիշտն ասած, բերեք ինձ հեռու պահեք էդ ամեն ինչից»,- նշեց նա:

Խոսելով իր եւ Ղուկասյանի հարաբերությունների մասին` նա նաեւ հայտարարեց, որ իր կյանքի ընթացքում որեւէ մեկի հետ թշնամական հարաբերություններ չի ունեցել: