Ֆուտբոլային թիմի մեծարումը վերածվել է զանգվածային անկարգությունների

18 տարվա ընթացքում առաջին անգամ Ֆրանսիայի չեմպիոն դարձած փարիզյան «Պարի Սեն Ժերմեն» ֆուտբոլային թիմի մեծարումը վերածվել է զանգվածային անկարգությունների. տեղեկացնում է ИТАР-ТАСС-ը:

Տրոկադերո հրապարակում, որտեղ բեմ է եղել տեղադրված հանդիսավոր արարողության համար, հավաքվել է մոտ 15 հազար երկրպագու: Նրանցից շատերը սկսել են ծխակոներ պայթեցնել ու բախման մեջ են մտել ոստիկաններ հետ: Կոտրվել են հրապարակի շրջակայքի խանութների, կայանված մեքենաների ապակիները:

Անկարգությունների հետեւանքով տասնյակ մարդիկ հիվանդանոց են տեղափոխվել, այդ թվում` ոստիկաններ:

Ստեղծված իրադրության պատճառով թիմի շփումը երկրպագուների հետ տեւել է ընդամենը 5 րոպե. նրանք արագ բեմ են բարձրացել` մրցանակը ստանալու համար, ու հեռացել: Անվտանգության նկատառումներով թիմի ղեկավարությունը նաեւ չեղյալ է հայտարարել ֆուտբոլիստների զբոսանքը Սենայով: