Անսովոր թրթիռ` մարզային թատրոններում

Երեկ տեղի ունեցավ «Թատրոն X» հանրապետական փառատոնի փակման արարողությունը:

Փառատոնի ժյուրիի անդամ Կարինե Խոդիկյանը, ով հասցրել էր փառատոնի մարզային ներկայացումների ժամանակ հիվանդանալ, ինչը փաստում է մարզային թատրոնների ոչ բարվոք վիճակում լինելը /ջեռուցում չկա/, նշեց, որ ներկայացումների որակը հակադարձ համեմատական էր դահլիճների նվազագույն պայմաններին:

«Ինձ ահավոր վատ էի զգում, եւ մարմինս երազում էր ժամ առաջ դահլիճը լքելու մասին, սակայն ներկայացումներն այնքան լավն էին, որ հաճույքով նայել եմ բոլորն էլ»,- ասաց Խոդիկյանը:

Ժյուրիի մյուս անդամը` Հովհաննես Թեքգյոզյանը, կարծում է, որ թատրոնն անսովոր աշխարհ է, եւ մարզային թատրոններում նա անսովորության անսովոր թրթիռ է տեսել:

Երաժշտագետ Նելլի Ավետիսյանը մարզեր այցելությունների ժամանակ նկատել է, որ երիտասարդները սկսել են նոր մոտեցմամբ մատուցել անգամ դասական ստեղծագործությունները. «Կուզեմ, որ «Թատրոն X»-ը շարունակվի եւ կարողանա իր դրական ազդեցությունը թողնել հանդիսատեսի վրա եւ թատրոնների զարգացման հարցում»: