Ադրբեջանում հերթական գրողին են հալածում հայամետության համար

Մոսկվաբնակ ադրբեջանցի գրող, ճանաչված «Գաստարբայթեր» վեպի հեղինակ Էդուարդ Բաղիրովը ազգայնականների հերթական թիրախն է դարձել Ադրբեջանում:

Ապրիլի 24-ին իր բլոգում նա գրել էր. «Մոսկվացի ադեկվատ ադրբեջանցիների անունից ցավակցում են հայ ժողովրդին 1915 թվականին Թուրքիայում տեղի ունեցած Ցեղասպանության տարելիցի կապակցությամբ»: Այդ կապակցությամբ գրողի հասցեին տարատեսակ սպառնալիքներ եւ վիրավորանքներ են հնչում:

Օրինակ` լրագրող Աքպեր Հասանովը համարում է, որ Բաղիրովը նախ` հնարավոր է` կապված է ռուսական հատուկ ծառայությունների հետ, երկրորդ` հարբեցող է: Իսկ գրող Նաթիգ Ռասուլզադեն Day.az-ի հետ զրույցում հայտարարել է. «Ես նրա հետ անձամբ ծանոթ չեմ եւ չեմ կարող ասել` ինչ նկատառումներով է նա դա ասել: Միակ բանը, որ կարող եմ հաստատել, որ նման մարդը չի կարող ադրբեջանցի լինել` ո'չ «մոսկվացի», ո'չ «բաքվեցի», ո'չ «թուրքմեն»: Ադրբեջանական ազգանունը դեռ չի նշանակում հոգում ադրբեջանցի լինել: Հայտարարությունից դատելով` նա հոգում ամեն ինչ է, բայց ոչ Բաղիրով»: