Հայերի մասին գրած ադրբեջանցի գրողին հալածում են իր երկրում

Ադրբեջանցի գրող Աքրամ Այլիսլիին առաջարկում են լքել երկիրը: Կառավարամետ երիտասարդների մի խումբ այսօր Բաքվի նրա տան առջեւ պիկետ է կազմակերպել` դժգոհելով նրա «Քարե երազներ» գրքի դեմ: Երիտասարդները վանկարկել են` «Ամոթ, Աքրամ Այլիսլի», «Աքրամ Այլիսլի, հայ»:

Ոստիկանները չեն միջամտել ակցիային, որի վերջում այրել են գրողի դիմանկարը. տեղեկացնում է Regnum-ը:

«Ենի Ազերբայջան» կուսակցության գործադիր քարտուղար Ալի Ահմեդովն, իր հերթին, մեղադրել է գրողին ազգային շահերի դավաճանության մեջ: «Ադրբեջանական ժողովրդին նվաստացնող մարդն իրավունք չունի կրելու ժողովրդական գրողի կոչումը: Այլիսլիի «Քարե երազներ» ստեղծագործությունը բիծ է ժամանակակից  ադրբեջանական գրականության  վրա: Անհնար է պատկերացնել նման անարդարություն եւ այլասերվածություն: Այլիսլիի նման ժողովրդին ատող երկրորդ գրող դժվար է գտնել»,- ասել է նա` հավելելով, որ գրողը հավանորեն իր գենետիկ արմատների պատվերն է կատարում:

«Քարե երազներ» ստեղծագործությունը նվիրված է Ադրբեջանական ԽՍՀ-ում բնակված հայերին: Նախաբանում գրված է. «Նվիրվում է իմ երկրացիների հիշատակին, որոնք իրենցից հետո թողեցին անարցունք մնացած ցավ»: Վեպում զուգահեռներ են տարվում 1919 թվականին Ագուլիսի հայերի ոչնչացման եւ Սումգայիթի ու Բաքվի կոտորածների միջեւ: