Սիրիայում ԵՄ-ից 600 վարձկան է պատերազմում

Սիրիայում պատերազմում է ԵՄ երկրների 600 քաղաքացի` հակակառավարական ուժերի 10 տոկոսը: Այդ մասին հայտարարել է ԵՄ ահաբեկչության դեմ պայքարի համակարգող Ժիլ դը Քերշովը` երեկ ելույթ ունենալով Եվրախորհրդարանում:

«Եթե այդ մարդիկ չսպանվեն Սիրիայում, նրանք լուրջ վտանգ են ներկայացնելու իրենցից Եվրոպա վերադառնալուց հետո»,- ասել է նա:

Ըստ Քերշովի` երիտասարդ եվրոպացիների մի մասը Սիրիա է մեկնում «ռոմանտիկ նկատառումներով», մյուս մասը` «արմատական իսլամական քարոզչության» զոհն են. տեղեկացնում է ИТАР-ТАСС-ը:

«Օտարերկրյա գրոհայինների թիվը Սիրիայում հազարների է հասնում, ներառյալ` վարձկանները Հյուսիսային Աֆրիկայից եւ Բալկաններից»,- հայտարարել է նա:

Երեկ Եվրախորհրդարանին ներկայացված տարբեր վերլուծությունների համաձայն` եվրոպացիների թիվը Սիրիայում 140-600 մարդ է, նրանց մեծ մասը Գերմանիայի, Բելգիայի եւ Մեծ Բրիտանիայի քաղաքացիներ են: Իսկ եթե հաշվի առնվի այն, որ Սիրիա են մեկնում դեռեւս քաղաքացիություն չստացած պակիստանցիներ, աֆղանցիներ, իրաքցիներ ե այլն, այդ թիվը զգալիորեն կաճի: