ԷՏԱ-ի նախկին առաջնորդին Ֆրանսիայում դատապարտել են ցմահ բանտարկության

Ֆրանսիական դատարանը բասկերի ԷՏԱ (Euzkadi Ta Azkatasuna` «Հայրենիք եւ ազատություն») ահաբեկչական կազմակերպության ռազմական թեւի նախկին առաջնորդ Միկել Կարերա Սարոբեին դատապարտել է ցմահ բանտարկության 2007-ին Ֆրանսիայում երկու իսպանացի ոստիկան սպանելու համար. տեղեկացնում է France-Presse գործակալությունը:

Սարոբեն ձերբակալվել է 2010-ի մայիսին: Նա բանտում նվազագույնը պետք է անցկացնի 22 տարի, որից հետո իրավունք ունի ազատ արձակման խնդրագիր ներկայացնել:

Նրա գործընկերուհի Սայոա Սանչեսը դատապարտվել է 28 տարվա ազատազրկման:

ԷՏԱ-ի ստեղծման պաշտոնական տարեթիվը 1959 թվականի հուլիսն է: 2011-ին կազմակերպությունը «անժամկետ եւ համընդհանուր զինադադար» է հայտարարել եւ հրաժարվել բռնությունից: