Պավլիաշվիլիի փեսան նրան սպանության ֆինանսավորման մեջ է մեղադրել

Հանրահայտ երգիչ Սոսո Պավլիաշվիլիի փեսան` Վախթանգ Չխապելիան, երգչին մեղադրել է վրացի գործարար Անտոն (Ավթանդիլ) Ադուաշվիլիի սպանությունը ֆինանսավորելու մեջ. հայտնում է РИА Новости-ն:

«Անտոնը տարաձայնություններ ուներ Սոսո Պավլիաշվիլիի հետ։ Անտոնը, Սոսոյին պարբերաբար խաբելով, մեծ գումարներ է կորզել։ Հենց նման բազմաթիվ փաստերի համար էլ Սոսոն մտադիր էր Անտոն Ադուաշվիլիին պատժել, ինչի իրականացումն ես ինձ վրա վերցրի, իսկ ֆինանսապես ինձ օգնեց Սոսոն»,- հայտարարել է Չխապելիան՝ նշելով, որ նպատակն Ադուաշվիլիին սպանելը չի եղել, այլ ֆիզիկական բռնության կիրառումը։

Չխապելիայի խոսքերով` նա գտել է մեկին, ով համաձայնել է կատարել պատվերը 50 հազար դոլարով։

Սեփական մեքենայում գնդակահարված Ավթանդիլ Ադուաշվիլիի դին հայտնաբերվել էր 2012-ի նոյեմբերին: Ըստ վրացական ԶԼՄ-ների` գործարարը Պավլիաշվիլիի ընկերն էր: