ԱԷՄԳ-ը Հայաստանին 6 սեյսմիկ կայաններ է տրամադրել

Ատոմային էներգիայի միջազգային գործակալությունը (ԱԷՄԳ) Հայաստանի ատոմային էլեկտրակայանի (ՀԱԷԿ) սեյսմիկ անվտանգության բարձրացման նպատակով, տեխնիկական համագործակցության ազգային ծրագրի շրջանակներում, տրամադրել է 6 նորագույն GURALP 6TD լայնատիրույթ սեյսմիկ կայաններ` ՀԱԷԿ-ի շուրջ տեղադրված և գործող հեռաչափական սեյսմիկ ցանցը արդիականացնելու համար:

Սարքերը ԱԷՄԳ-ը տրամադրել է ՀՀ ԿԱ միջուկային անվտանգության կարգավորման պետական կոմիտեին, որն էլ դրանք փոխանցել է օգտագործման ՀՀ ԱԻՆ Սեյսմիկ պաշտպանության ծառայությանը: Ժամանակակից սեյսմիկ կայանների տեղակայումը ՀԱԷԿ-ի շուրջ մեծապես կնպաստի կատարվող մշտադիտարկումների հուսալիության բարձրացմանը:

Տեղադրվելիք սարքերը ներկայումս գտնվում են ՀՀ ԱԻՆ ՍՊԾ համակարգի «Սեյսմիկ պաշտպանության արևմտյան ծառայություն» ՊՈԱԿ-ում, որտեղ սկսվել է դրանց փորձարկումը: Նախքան սարքավորումների տեղադրումը կատարվելու են տեղանքի ընտրություն և գործիքային չափումներ` սեյսմիկ տատանումների ֆոնային արժեքները որոշելու համար: