Իտալիայի արտգործնախարարը հրաժարական է տվել

Իտալիայի արտգործնախարար Ջուլիո Տերցին հրաժարական է տվել երկու իտալացի նավաստիների գործի պատճառով. գրում է «Ռոյթերս»-ը:

Փետրվարին իտալացի նավաստիները հնդկական ձկնորսական նավակ էին տեսել և, մտածելով, թե դրանք ծովահեններ են, կրակ էին բացել: Երկու հնդիկ ձկնորս սպանվել էր:

Իտալացի նավաստիներին հնդիկները թույլ էին տվել վերադառնալ Իտալիա` մասնակցելու խորհրդարանական ընտրություններին: Հռոմը որոշել էր չվերադարձնել նրանց, թեեւ Հնդկաստանում Իտալիայի դեսպան Դանիելե Մանչինին գրավոր երաշխիքիներ էր տվել: Դրանից հետո Մանչինիի ելքը Հնդկաստանից արգելվել էր: Իսկ Իտալիան Հնդկաստանին մեղադրում էր Վիեննայի կոնվենցիան խախտելու մեջ: Ավելի ուշ Իտալիան, այնուամենայնիվ, նավաստիներին հանձնեց Հնդկաստանին:

«Ես այլևս չեմ կարող այս կառավարությանը մաս կազմել և հայտարարում եմ իմ հրաժարականի մասին: Իմ բողոքները նավաստիներին Հնդկաստանին հանձնելու վերաբերյալ չլսվեցին»,- ասել է Տերցին: