Շատ ուրախ եմ, որ կարողացա պահպանել տիտղոսս. Արթուր Ալեքսանյան

Թբիլիսիում ընթացող ըմբշամարտի Եվրոպայի առաջնությունում հայազգի հունահռոմեական ըմբիշ, Եվրոպայի չեմպիոն, Լոնդոնի Օլիմպիական խաղերի բրոնզե մեդալակիր, 96կգ քաշային Արթուր Ալեքսանյանը պաշտպանեց Եվրոպայի չեմպիոնի տիտղոսը՝ եզրափակչում՝ 6:0 հաշվով, առավելության հասնելով բուլղարացի Վլադիսլավ Մետոդիևի նկատմամբ:

-Արթու՛ր, եզրափակչում բավական հեշտ առավելության հասաք բուլղարացի ըմբիշի նկատմամբ: Նա իրո՞ք հեշտ մրցակից էր:

-Հեշտ չի կարելի ասել, պարզապես նա ավելի թույլ էր, քան Ադրբեջանը ներկայացնող վրացի ըմբիշը:

-Այսինքն, կարելի է ասել, Ադրբեջանը ներկայացնող մարզի՞կն էր ամենաբարդ  մրցակիցը:

-Այո, համեմատաբար: Ամենաբարդը նրա հետ գոտեմարտն էր:

-Եվրոպայի չեմպիոն դառնալը բարդ է , սակայն ավելի բարդ է պաշտպանել չեմպիոնի տիտղոսը: Ի՞նչ սպասելիքներով էիք գալիս Թբիլիսի:

-Բնականաբար, բարդ է, սակայն ես շատ էի ուզում հաղթել այստեղ և պահպանել տիտղոսս, և, ինչպես տեսնում եք, ստացվեց:

-Առջևում ըմբշամարտի աշխարհի առաջնությունն է, կխոսե՞ք սպասելիքներից:

-Այո՛, մեկ  ամիս հետո կսկսվեն հավաքները: Կփորձեմ ամեն հնարավոր բան անել, որպեսզի այնտեղ էլ կարողանամ հաղթել և հայ ազգին ոսկե մեդալ պարգևել:

Շուշանիկ ՀԱԿՈԲՅԱՆ

Թբիլիսի