Ռիչարդ Հովհաննիսյանը չի հավատացել որդու հաղթանակին

«Ես ուզում եմ շնորհավորել Ձեզ, որ Րաֆֆի Հովհաննիսյանի միջոցով Ձեր ձայնը լսելի դարձրեցիք»,- այսօր Ազատության հրապարակում հայտարարեց Րաֆֆի Հովհաննիսյանի հայրը` Ռիչարդ Հովհաննիսյանը:

Նա խոստովանեց, որ բոլորովին հակառակ կարծիքմ է ունեցել իր որդու` նախագահի թեկնածություն առաջադրելու կապակցությամբ, քանի որ վստահ է եղել որ նրան կջնջեին, եւ դա քաղաքականորեն ինքնասպանություն էր, բայց շատ ուրախ է, որ սխալվում էր:

«Ոչ միայն ցնցեցիք Հայաստանը, այլեւ ամբողջ Սփյուռքը նոր հույս ստացավ, նոր հեռանկարներ երեւացին, թե իր տեղը ինչ կարող է լինել այս երկրի բարգավաճման համար: Ես միշտ երկխոսության եւ փոխադարձ զիջման կողմնակից եմ եղել: Շատերի համար դա կարող է հաճելի չթվալ, բայց երկխոսությունը պետք է, նախ` որովհետեւ, պետք է դուրս գալ այս վիճակից, եւ երկորդ` մեր ազգը հանդարտության պետք ունի»,- ասաց Ռիչարդ Հովհաննիսյանը:

Նա իր խոսքը վերջացրեց` պարզապես նշելով, որ իր հույսն ու հավատն է, որ այսօրվա մեր ժողովրդի չարչարանքը եւ Րաֆֆի Հովհաննիսյանի զոհողությունն իզուր չեն: