Ձմեռ պապի գոյությանը երբեք չի հավատացել, ամանորյա ուտեստներից էլ ամենաշատը խոզի բուդ է սիրում

2009 թվականի աշխարհի չեմպիոն, ծանրամարտիկ Նազիկ Ավդալյանի համար ամենահիշարժան տարին իր և ապագա ամուսնու ծանոթության տարին էր: «Ինձ համար ամենահիշարժան տարին 2008 թվականն էր, երբ  Ամանորն առաջին անգամ դիմավորեցի  ապագա ամուսնուս հետ:  Դա, ինչպես նաև իմ փոքրիկի ծննդյան առաջին Նոր տարին ինձ համար առանձնահատուկ են եղել»,- Yerkir.am-ի հետ զրույցում ասաց նա:

Աշխարհի և Եվրոպայի չեմպիոնը Ձմեռ պապից նվեր երբևէ չի ուզել, քանի որ միշտ էլ իմացել է, որ իրականում Ձմեռ պապ գոյություն չունի:  «Ես միշտ էլ իմացել եմ,   որ Ձմեռ պապ իրականում չկա: Դեռևս 3 տարեկան էի, երբ մայրիկին ասացի` գիտեմ, որ իրականում չկա Ձմեռ պապի:  Իսկ նա ինձ ասաց, որ կա, բայց ես չհավատացի, քանի որ ոչ մի անգամ չէի տեսել իմ պատկերացրած Ձմեռ պապին»,- պատմում է Նազիկ Ավդալյանը: 

Նա ամանորյա ուտեստներից առանձնացնում է խոզի բուդը.   «Ամանորյա ուտեստներից ամենից շատ սիրում եմ խոզի բուդը:  Ոչ միայն Ամանորին, այլև տարվա ընթացքում մի քանի անգամ, երբ վերադառնում եմ  մրցումներից կամ հավաքներից. խնդրում եմ մայրիկին, որպեսզի պատրաստի»:

Ամանորի գիշերը միշտ երազանք է պահում. «Ինձ թվում է, անկախ տարիքից, բոլորն էլ երազանքներ պահում են:  2009-ին երազանք էի պահել դառնալ աշխարհի չեմպիոն, և այն իրականացավ, թեև այնքան էլ հույս չունեի, քանի որ քաշի հետ կապված խնդիրներ կային»:  Զրույցի վերջում  Ավդալյանը հղեց իր ամանորյա բարեմաղթանքը.  «Առաջին հերթին` բոլորին ցանկանում եմ  առողջություն: Եթե դա կա, մնացածը կլինի: Հաջողակ տարի լինի բոլորի համար: Մեր երկրին խաղաղություն: Առանձնահատուկ ցանկանում են շնորհավորել մեր զինվորներին: Ես հպարտանում եմ նրանցով»: