Բնակչության հիասթափությունը ՀՅԴ-ն կփարատի ավագանու ընտրություններում

Դաշնակցությունը Երևանի ավագանու ընտրություններին լավատեսորեն է տրամադրված: Ավագանու ՀՅԴ ցուցակի 5-րդ համարի` Արթուր Եղիազարյանի խոսքով`  քարոզարշավի ընթացքում իրենք փորձելու են համագործակցել շահագրգիռ քաղաքական ուժերի հետ` ընտրակեղծիքների հնարավորությունը բացառելու համար:

«Մեզ համար առաջնայինը քաղաքապետի խնդիրը չէ: Մենք փորձում ենք հաղթահարել նախագահական ընտրություններից հետո բնակչության ապրած հիասթափությունը»,- այսօր հրավիրած ասուլիսում հայտարարեց Ա. Եղիազարյանը: 

ՀՅԴ ներկայացուցչի խոսքով` ընտրություներից հետո իշխող քաղաքական ուժը տնօրինում է բոլոր ռեսուրսները և իրենք պետք է ձգտեն հասնել փոփոխությունների:

«Երևանը պետք է լինի հարմարավետ տուն երևանցու,  Երևան ժամանած օտարերկրյա հյուրերի համար, նաեւ  արժանապատիվ քաղաք` հայաստանցու համար»,- ասաց Եղիազարյանը և շեշտեց, որ իրենք հասնելու են հաղթանակի: