Կարեն Կարապետյանը վարչապետ դառնալու ցանկություն չունի

ԱԺ ՀՀԿ խմբակցության պատգամավոր, նախագահի աշխատակազմի նախկին ղեկավար Կարեն Կարապետյանը ՀՀ վարչապետ դառնալու ցանկություն չունի: Այս մասին Կարապետյանը հայտնեց Yerkir.am-ի թղթակցի հետ զրույցում:

Նշենք, որ, որպես վարչապետի հավանական թեկնածու, վերջին շրջանում նշվում էր նաեւ Կարեն Կարապետյանի անունը: Նա հայտարարեց, որ ոչ միայն նման ցանկություն չունի, այլեւ այդ ուղղությամբ աշխատանքներ էլ չի տարել, ինչպես որ նշվում է մամուլում:

Կարապետյանը հրաժարվեց գնահատել գործող վարչապետ Տիգրան Սարգսյանի աշխատանքը, նշեց, որ ոչ թե ինքը պետք է գնահատի, այլ ժողովուրդն ու երկրի ղեկավարը:

Հարցը, թե Սերժ Սարգսյանի երդման արարողությունից հետո հնարավո՞ր է իրեն այլ պաշտոնում տեսնենք, օրինակ` կառավարությունում, Կարապետյանը «ոչ կոռեկտ» որակեց եւ պատասխան չտվեց: Իսկ դիտարկմանը, թե գո՞հ է նախագահական ընտրություններում, որպես Սերժ Սարգսյանի շտաբի պետի տեղակալ, իր աշխատանքից, նա հայտարարեց, որ դժվարանում է պատասխանել:

Կարեն Կարապետյանի հետ ամբողջական հարցազրույցը՝ վաղը: