Երեւանում գնում էին գողի հետեւից, փրկեցին ինքնասպանության փորձ անողին

Փետրվարի 26-ին` ժամը 22.21-ին, քաղաքացուց ահազանգ է ստացվել, որ Երևանի Արամ Խաչատրյան փողոցի թիվ 24 բնակարանում հնարավոր է գող կա. անհրաժեշտ է փրկարարների օգնությունը:

ԱԻՆ-ի կայքի հաղորդմամբ` դեպքի վայր է մեկնել հատուկ նշանակության փրկարարական աշխատանքներ իրականացնող կենտրոնի հերթապահ խումբը:

Դեպքի վայր մեկնելու ճանապարհին փրկարարները Կիևյան կամրջի տարածքում նկատել են մոտ 35 տարեկան կնոջ, ով փորձել է իրեն նետել ընթացող ավտոմեքենաների տակ, սակայն անհաջող փորձից հետո նա վազել է դեպի կամուրջը, որպեսզի ցած նետվի:

Փրկարարները կանխել են ինքնասպանության փորձը և կնոջը հանձնել տարածքում հերթապահություն իրականացնող ոստիկանության աշխատակիցներին:

Այնուհետև փրկարարական աշխատանքներ իրականացնող կենտրոնի հերթապահ խումբը մեկնել է նախորդ կանչի վայր: