Լցոնում`27/1 ընտրատեղամասում

Երեկ «Հայկական ժամանակ» թերթի խմբագրություն է այցելել Փառանձեմ մայրիկը` Արցախյան ազատամարտի առաջին զոհ Էդիկ Տոռոզյանի մայրը` հայտնելով, որ Նոր Հաճնի 27/1 ընտրական տեղամասում, որտեղ ինքն ընտրությունների օրը եղել է Հրանտ Բագրատյանի վստահված անձը, լցոնումներ են եղել: Փառանձեմ մայրիկը թերթին պատմել է հետեւյալը.

-Տեղամասում տեսա, որ ընտրողների ցուցակի` գրանցամատյանւ մեջ, որտեղ ընտրողների անուն-ազգանուններն են, ինչ-որ բան էին գրում: Տեղիցս վեր կացա, գնացի, մոտեցա իրենց, տեսա, որ անձնագրի համարներ են լրացնում` առանց անձնագրերի, առանց ձեռքի տակ որեւէ ցուցակ ունենալու: Կանգնեցի, նայեցի, սրանք զգաստացան, թողեցին, հետո որ արկղը բացեցինք, արկղի մեջ, տակը ուղիղ լցված էին ծրարներով: Էդ ծրարները շատ ուղիղ դարսված էին իրար վրա: Ասացի` չհասկացա, էս էլ լցրել եք նե՞րսը: Գոռոցս գցեցի, որ էսպես չի կարելի, սենց կեղտոտ ընտրություններ եք անում:

-Ի՞նչ ասաց հանձնաժողովի նախագահը:

-Ոչ մի բան: Երեւի նրանք են արել, ինքն ինձ մոտ ամոթով էր:

-Նրանք ովքե՞ր են:

-Էդ հանձնաժողովի անդամները: Երկու տղա էին: Անունները չգիտեմ:

-Այսինքն կարծում եք, որ հանձնաժողովի նախագահն այդտեղ կապ չունե՞ր:

-Չէ, ինքը չի արել: Ես էդ կարծիքին եմ, որովհետեւ ինքը ոչ մի բառ չխոսեց: Բայց երկու տղա կային էնտեղ` նրանք էին:

-Իսկ էդ լցոնած քվեաթերթիկներում ո՞ր թեկնածուի օգտին էր էվեարկած:

- Որ հանեցին` Սերժ Սարգսյան, Սերժ Սարգսյան:

-Մոտավորապես քանի՞ քվեաթերթիկ:

-Երկու հարյուր հատ միայն տակին ա եղել:

Թերթը նշում է, որ այս 27/1 ընտրատեղամասում Րաֆֆի Հովհաննիսյանը ստացել է 718, Սերժ Սարգսյանը` 408 քվե: Փառանձեմ մայրիկը թերթին ասել է նաեւ, որ այդ տեղամասում հանձնաժողովի «Ժառանգության» ներկայացուցչին խորհուրդ է տվել չստորագրել արձանագրության տակ, բայց վերջինս ստորագրել է: Ըստ ԿԸՀ-ի` 27/1-ում հանձնաժողովի նախագահը ԲՀԿ-ական Արարատ Դումանյանն է, քարտուղարը` ՀՀԿ-ական Անդրանիկ Ավագյանը: