Նախագահն ասաց` եւս մեկ անգամ

«Համոզված եղեք` 2018 թվականին ՀՀ հաջորդ նախագահին եւ մեր ժողովրդին հանձնելու եմ բոլորովին ուրիշ Հայաստան՝ նոր սոցիալ-տնտեսական և քաղաքական նկարագրով, եւ դա լինելու է ապահով Հայաստանը։ Ես սա համարում եմ իմ պարտքը»,- նախընտրական քարոզարշավի շրջանակներում հրազդանցիների հետ հանդիպման ժամանակ հայտարարեց գործող նախագահ, նախագահի ՀՀԿ-ական թեկնածու Սերժ Սարգսյանը:

Նա ընդգծեց, որ այսօր էլ ՀՀ-ն կարելի է համարել ապահով, եթե հաշվի առնենք ռազմական պաշտպանվածությունը:

Սերժ Սարգսյանը հայտարարեց. «Ձեր երազած Հայաստանը իմ երազած Հայաստանն է, նույն ուղղությամբ նայելը եւ միասին երազելը լավ է, բայց ավելի լավ է իրատեսական կոնկրետ քայլերով դեպի նպատակակետ գնալը»:

Նախագահը հորդորեց հրազդանցիներին երբեք չմտածել, որ երկրի զարգացումը կախված է միայն նախագահից կամ կառավարությունից: «Եվս մեկ անգամ մենք ոտքի կկանգնենք ողջ հասակով, ինչպես դա արել ենք կռվի դաշտում, այս անգամ մենք ոտքի կկանգնենք ողջ հասակով` արարելու, աշխատելու, մեր հայրենի տունը հիմնավորապես վերանորոգելու եւ ամրացնելու համար, եւ այս անգամ մենք ասում ենք` առաջ դեպքի ապահով Հայաստան»,- հայտարարեց Սերժ Սարգսյանը: