130-140 հազար դրամ աշխատավարձով չեն ուզում աշխատել. Սերժ Սարգսյան

Քարոզարշավի շրջանակներում Չարենցավան քաղաքի բնակիչների հետ հանդիպման ժամանակ գործող նախագահի, նախագահի ՀՀԿ-ական թեկնածու Սերժ Սարգսյանը, խոսելով աշխատատեղերի մասին, մի ուշագրավ հայտարարություն արեց:

Նա ընդգծեց, որ մարդիկ չեն ցանկանում ցածր աշխատավարձով աշխատատեղերում աշխատել: Սերժ Սարգսյանը նաեւ կրկնեց վարչապետի խոսքերը, որ մարդիկ նախընտրում են նպաստ ստանալ, քան թե աշխատել: Նա հիշեց նաեւ երկրում գրանցված այն մի քանի դեպքերը, երբ մարդիկ իրենց անասուններին վաճառել են, որ կարողանան օգտվել նպաստից:

Նախագահը հայտարարեց, որ Երեւանում հազարավոր աշխատատեղեր կան, բայց` ցածր վարձատրությամբ, եւ մարդիկ չեն ցանկանում աշխատել այդտեղ: «Երեւանցիները չեն ուզում 130-140 հազար դրամ աշխատավարձով աշխատատեղերում աշխատել, որովհետեւ դրանով չեն կարողանա հոգալ իրենց հոգսերը»,- հայտարարեց Սերժ Սարգսյանը:

Նա ընդգծեց, որ ամեն բնակավայրում խնդիրները տարբեր են: Նախագահը նշեց, որ անկախությունից հետո Չարենցավանը ծանր կացության մեջ հայտնվեց, բայց չի կարծում, որ մեղավորն անկախությունն է:

Չարենցավանցիների հետ հանդիպման ժամանակ նախագահը խոսեց նաեւ կենսաթոշակների մասին, մասնավորապես` ակնակրեց պարտադիր կուտակային կեսաթոշակային հիմնադրամի անհրաժեշտության մասին: