Վրաց-աբխազական երկաթուղու վերագործարկումը հնարավոր է

Հայաստան-Վրաստան-Աբխազիա-Ռուսաստան երկաթգծի վերագործարկումը հնարավոր է. կառավարությունում` Հայաստանի եւ Վրաստանի վարչապետերի համատեղ ասուլիսում, հայտարարեց Վրաստանի վարչապետ Բիձինա Իվանիշվիլին:

Նա նշեց, որ այս հարցում կողմերից մեկն էլ Ռուսաստանն է, որի հետ Վրաստանի հարաբերություններում կային եւ մնում են մեծ խնդիրներ: Իվանիշվիլին նշեց, որ վրացական կողմը ջանում է Ռուսաստանի հետ հարաբերությունները վերականգնել` չնայած բազմաթիվ հիմնախնդիրներին:

«Ինչպես  գիտեք, տարածքների հետ կապված եւ այլ հարցեր շուտ չեն լուծվի, բայց երկաթուղային հաղորդակցության հետ կապված հարցերը, կարծում եմ, կլուծվեն ավելի արագ: Վրացական կողմն այս հարցի առնչությամբ երաշխավորում է, որ խնդիրներ չկան, ինչ մնում է ռուսական կողմի դիրքորոշմանը, մենք հույս ունենք, որ նրանք էլ շատ արագ կարձագանքեն այս հարցին»,- ասաց Վրաստանի վարչապետը:

ՀՀ վարչապետ Տիգրան Սարգսյանը նույնպես արձագանքեց. «Մենք արձանագրել ենք, որ ջանքեր կգործադրենք, որպեսզի այդ երկաթուղին աշխատի` աշխատի արդյունավետ, մենք հետաքրքրված ենք, որ այս հարցը լուծում գտնի հնարավորինս արագ, եւ մենք ակտիվ դիրքորոշում կգրավենք այս հարցի կարգավորման ուղղությամբ»: