Կվերանորոգվեն թատրոնների եւ համերգային դահլիճները

Մարտի 1-ից Ալ. Սպենդիարյանի անվան օպերայի եւ բալետի ազգային ակադեմիական թատրոնը կվերադառնա իր բնականոն աշխատանքներին:

Yerkir.am-ի հետ զրույցում ՀՀ մշակույթի նախարար Հասմիկ Պողոսյանը նշեց, որ այժմ հիմնական աշխատանքներ են տարվում բեմի լուսաձայնային տեխնիկայի, լրացուցիչ ձայնագրող ստուդիայի տեղադրման, ինչպես նաեւ բեմական մեխանիզմների արդիականացման ուղղությամբ:

«Թատրոնի բեմի վերանորոգման աշխատանքներն իրականացնում է ավստրո-գերմանական մի ընկերություն: Մինչեւ թատրոնի շահագործումը` միջանկյալ հանձնում կլինի, որպեսզի վերջնական անգամ լուծվեն խնդիրները»,- ասաց նախարարը` հավելելով, որ թատրոնը վերջին անգամ մասնակիորեն վերանորոգվել էր 2001-2003 թթ.` «Լինս»-ի հիմնադրամի ֆինանսավորման ծրագրի շրջանակում:

Նա տեղեկացրեց, որ արդեն իսկ կա ՀՀ նախագահ Սերժ Սարգսյանի հանձնարարականը, ըստ որի` 2013-ին սկսվեն մյուս պետական դահլիճների վերանորոգման աշխատանքները նույնպես. «Մասնավորապես` կվերանորոգվեն Արամ Խաչատրյանի անվան ֆիլհարմոնիկ համերգասրահի, Սունդուկյանի եւ Պարոնյանի անվան թատրոնների դահլիճները»: