Ներկայացումը տոն է դերասանի համար

Լոս Անջելեսում հոկտեմբերի 7-28-ը անցկացված «Աշխարհի թատրոններ» միջազգային փառատոնին մասնակցել է նաեւ Երեւանի պետական կամերային թատրոնը:

«Ներկայացումներն անցան շատ լավ եւ միանգամից ընդունվեցին հանդիսատեսի կողմից»,- ասաց ՀՀ արվեստի վաստակավոր գործիչ, թատրոնի հիմնադիր Արա Երնջակյանը: Նա նշեց, որ երեք ծրագրված ներկայացումներից` «Կառավարական համերգ», «Ի զեն» եւ «Ինչ տարբերություն» բացի, իրենք խաղացել են նաեւ չորրորդը:

Փառատոնին մասնակցելու հայտ չի ներկայացվում. իրենք են ընտրում, թե որ թատրոնն է մասնակցելու: Արա Երնջակյանի խոսքերով`սա յուրահատուկ փառատոն է, որն անցկացվում է յուրահատուկ ձեւով. տարվա ընթացքում ընտրվում են մի քանի թատրոններ եւ հրավիրվում: Այդ ընթացքում ժյուրին սկսում է ընտրություն կատարել, եւ ընտրում է այն թատրոնը, որի հետագա աշխատանքը հովանավորելու է:  Տարվա վերջում հայտարարվում է հաղթող թատրոնի անունը:

Դերասան Արշալույս Հակոբյանի խոսքերով` ժյուրին շատ լավ կարծիք ուներ իրենց մասին, նրանք զարմացած ու ցնցված էին: «Դահլիճում տարբեր ազգերի ներկայացուցիչներ կային, եւ բոլորի համար ներկայացումը հասկանալի էր»,- հավելեց նա:

«Ես օտարություն չզգացի, ներկայացումը հենց սկսվում է, այն տոն է յուրաքանչյուր դերասանի համար»,- նկատեց թատրոնի դերասանուհի Լուիզա Ներսիսյանը:

«Ես վախենում եմ աչքով տալ, բայց այն տրամադրությունը եւ ոգեւորվածությունը, որ կա մեր հանդեպ, թույլ են տալիս ենթադրելու, կհաղթենք փառատոնում»,- ասաց Արա Երնջակյանը:

Ի դեպ, թատրոնն արդեն հրավեր է ստացել մասնակցելու հաջորդ տարի տեղի ունենալիք մեկ այլ փառատոնի: