Երկրի իշխանություններն օրինական չեն

Սոցիալ-դեմոկրատ հնչակյան կուսակցության ատենապետ, ՀԱԿ անդամ Լյուդմիլա Սարգսյանը վստահ է իրենց ուժերի վրա, քանի որ, ըստ նրա, ժողովրդի մեծամասնությունն իրենց կողքին է: Լրագրողների հետ հանդիպման ժամանակ նա նշեց, որ ՀԱԿ-ի հետագա քայլերը պայմանավորված չեն կոալիցիոն գործընկերության հաստատման կամ քայքայման հետ: Սակայն ՀԱԿ անդամը չի բացառում, որ կոալիցիան կարող է քայքայվել:

ՀՀԿ-ական պատգամավոր Սուքիաս Ավետիսյանն էլ բնական է համարում ՀԱԿ-ի մարտավարության փոփոխությունը. «ՀԱԿ-ը մե'կ արտահերթ ընտրություններ է պահանջում, մե'կ նախագահի հրաժարական, այնուհետեւ անհասկանալի ձեւով երկխոսությունը դադարեցնում է: Դա նրանց ռազմավարական խնդիրն է. նրանք են որոշում` ինչ պահանջներ դնել, սակայն մեզ համար անհասկանալի են այդ պահանջները»,- ասաց նա:

Պատգամավորը շեշտեց, որ իշխանությունը երկխոսությունը չի դադարեցրել եւ երբեւիցե չի մտածել, որ դա շահեկան է: Ամբողջ աշխարհում քաղաքական ուժերը երկխոսության միջոցով են քննարկում իրենց խնդիրները եւ գտնում դրանց լուծումները:

ՀԱԿ անդամ Լյուդմիլա Սարգսյանի հավաստմամբ` ՀՀԿ-ն մինչ օրս չի հասկացել, թե ինչու են իրենք պահանջում արտահերթ ընտրություններ: «Երկրի իշխանություններն այսօր օրինական եւ ժողովրդի կողմից չեն ընտրվել, հետեւաբար` շատ խոցելի են: Մենք առաջնորդվում ենք երկրի շահերով. միայն օրինական իշխանություններն են կարող ներկայացնել ժողովրդին եւ պաշտպանել նրա շահերը»,- վստահեցրեց ՀԱԿ անդամը:

Նա նաեւ ավելացրեց. «Մենք շատ ձայներ կհավաքենք. անհրաժեշտության դեպքում մենք կարողանում ենք  քանակ ապահովել»: