Մեծ Բրիտանիան կմնա ԵՄ-ում

Բրիտանական խորհրդարանի Համայնքների պալատի պատգամավորներն այսօր մերժել են ԵՄ-ից դուրս գալու մասին համազգային հանրաքվե անցկացնելու գաղափարը: Հանրաքվե անցկացնելու օգտին քվեարկել է 111 պատգամավոր, դեմ են եղել 483-ը:

Սակայն հանրաքվեի կողմնակիցների թիվը սպասվածից երկու անգամ շատ է եղել, իսկ դա, ըստ քաղաքագետների, տագնապալի ազդանշան է վարչապետ Դեւիդ Քեմերոնի համար: ԵՄ-ից դուրս գալու հանրաքվեի օգտին նաեւ 100 հազար ստորագրություն է հավաքվել. տեղեկացնում է ИТАР-ТАСС-ը:

Հանրաքվեն նախատեսում է պատասխանի երեք տարբերակ` շարունակել մնալ ԵՄ-ում, դուրս գալ բլոկից, փոխել բրիտանական անդամակցության ձեւաչափը` նվազագույնի հասցնելով քաղաքական կախվածությունը Բրյուսելից եւ պահպանելով տնտեսական համագործակցությունը միասնական Եվրոպայի հետ:

Մինչ քվեարկությունը Քեմերոնը փորձել է հանրաքվեի կողմնակից խորհրդարանականներին համոզել հրաժարվել այդ գաղափարից: «Մեր ազգային շահերը պահանջում են, որ գտնվենք ԵՄ-ում եւ օգնենք ձեւավորել այն կանոնները, որոնցով ղեկավարվում է միասնական շուկան` մեր խոշորագույն շուկան, որը սպառում է մեր արտահանվող արտադրանքի ավելի քան 50 տոկոսը, եւ որը մեզ մոտ կատարվող ներդրումների մեծ մասն է ապահովում: Դա աբստրակտ տեսական փաստարկ չէ, քանի որ վերաբերում է միլիոնավոր աշխատատեղերի, միլիոնավոր ընտանիքների եւ միլինովոր ձեռնարկությունների»,- հայտարարել է վարչապետը: