Թուրքերի նոր երգը` դարձյալ ՀԱԷԿ-ի մասին

ՀՀ ԱԻՆ-ը, ի պատասխան «Զաման» օրաթերթի հրապարակմանը, հաղորդագրություն է տարածել: Թուրքական լրատվամիջոցի հավաստմամբ` Վանի երկրաշարժից տուժել է նաեւ ՀԱԷԿ-ը: ԱԻՆ-ում դա բացառում են:

«Հոկտեմբերի 23-ին Վան քաղաքի մոտակայքում տեղի ունեցած երկրաշարժի ուժգնությունն էպիկենտրոնային գոտում կազմել է 9-10 բալ։ Հայկական ատոմային էլեկտրակայանի հեռավորությունն էպիկենտրոնային գոտուց մոտ 160 կմ է։

ՀՀ տարածքում երկրաշարժը զգացվել է 3-5 բալ ուժգնությամբ։ ՀԱԷԿ-ում երկրաշարժի ուժգնությունը եղել է 4 բալ, և ատոմակայանին որևէ վնաս չի եղել ու չէր կարող լինել, քանի որ այն հաշվարկված է առնվազն 9 բալ ուժգնության համար։ Ավելին` Թուրքիայում տեղի ունեցած երկրաշարժը ՀՀ տարածքում որևէ բնակավայրի, որևէ շենքի կամ շինության վնաս չի հասցրել։

ՀԱԷԿ-ի գլխավոր տնօրեն Գագիկ Մարկոսյանը տեղեկացրեց, որ երկրաշարժն իրենց մոտ զգացվել է ընդամենը 2-3 բալ ուժգնությամբ, որի մասին նույնիսկ ավելորդ է խոսել, իսկ Հայկական ատոմակայանը սեպտեմբերի 11-ից կանգնած է` պլանային վերանորոգման աշխատանքների պատճառով»,- գրված է հաղորդագրության մեջ: