Էպիլեպտիկ ջղաձգումներից ազատող մեթոդ

Վիճակագրությունը ցույց է տալիս, որ եթե էպիլեպսիա ունեցող մարդը վիրահատվի և վիրահատության ընթացքում հեռացվի ուղեղի` նոպաներ խթանող հատվածը, էպիլեպտիկները կարող են առնվազն 10 տարով ազատվել ջղաձգումներից:

Ինչպես տեղեկացնում է Doctors.am-ը, բրիտանացի գիտնականներն առաջարկում են վիրահատական միջամտությունն ընդունել որպես էպիլեպսիայի բուժման այլընտրանքային տարբերակ:

Լոնդոնի համալսարանական քոլեջին կից նյարդաբանության կենտրոնի մասնագետ Ջոն Դանկանի ղեկավարությամբ անցկացվել են վիրահատություն տարած` էպիլեպսիա ունեցող հիվանդների երկարաժամկետ ուսումնասիրություններ: Պարզվել է, որ 615 մարդուց 82%-ը միջամտությունից հետո 1 տարվա ընթացքում նոպաներ չէր ունեցել: 52%-ը նոպաներ չէր ունեցել հետագա 5 տարիների ընթացքում, իսկ 47%-ը` հետագա 10 տարիների ընթացքում:

Դանկանը ենթադրում է, որ անհրաժեշտ է վիրահատությունն անցկացնել ինչքան հնարավոր է շուտ, որը կարժենա մոտ 20 000 դոլար:

Ամբողջ աշխարհում կա էպիլեպսիայով տառապող մոտ 50 միլիոն մարդ: