"Արի տուն"` ամբողջ հայության ծրագիր (տեսանյութ)

«Արի տուն» ծրագիրը մեծ հետաքրքրություն է առաջացրել Սփյուռքի մեր հայրենակիցների մոտ եւ մեծ ոգեւորվածություն` Հայաստանի քաղաքացիների շրջանում:

«Տարիների արդյունքներն ու փորձը ցույց տվեցին, որ այն կարելի է համարել ամենահաջողված ծրագրերից մեկը»,- ՀՀ տարածքային կառավարման եւ Սփյուռքի նախարարությունների համատեղ ատյանի նիստում ասաց ՀՀ փոխվարչապետ Արմեն Գեւորգյանը:

Նա նշեց, որ «Արի տուն» ծրագիրը, բովանդակությունից զատ, հետաքրքիր է նաեւ իր ձեւաչափով: Այն իրականացվում է 2009-ից եւ ունի ճանաչողական բնույթ:

Ըստ Սփյուռքի նախարար Հրանուշ Հակոբյանի` «Արի տուն» պետական ծրագիրը դարձավ ժողովրդական ծրագիր:

«Այսօր ես վստահաբար կարող եմ ասել, որ այս ծրագիրը կայացած է: Այն մեծ նշանակություն ունի, քանի որ այդ բոլոր երիտասարդները Հայաստանի այցեքարտերն են: Այն ունի եւս մեկ առավելություն. երիտասարդների շփումը կարեւոր բաղադրիչ է մայրենի լեզվով հաղորդակցվելու համար, քանի որ ծրագրի մասնակիցների մեծ մասը չի տիրապետում հայերենին կամ խոսում են կցկտուր»,- ասաց Սփյուռքի նախարարության աշխատակազմի ղեկավար Ֆիրդուս Զաքարյանը:

Ի դեպ, ծրագրի իրականացման ընթացքում երիտասարդները նաեւ ընտանիքներ են կազմում. արդեն գրանցվել է ամուսնության չորս դեպք: