ՀԱԿ-ը դադարեցրել է շուրջօրյա հավաքները

ՀԱԿ-ը հայտարարեց դեռեւս սեպտեմբերի 30-ից ընթացող շուրջօրյա բողոքի գործողությունները Ազատության հրապարակում դադարեցնելու մասին:

Լեւոն Տեր-Պետրոսյանը այսօր կայացած հանրահավաքում հրապարակել է ՀԱԿ կենտրոնական գրասենյակի ընդունած փաստաթուղթը, որը, վերջինիս խոսքով, հանրահավաքի բանաձեւն է:

Թեպետ հանրահավաքի մասնակիցների զգալի մասը դեմ էր հանրահավաքների դադարեցմանը, Տեր-Պետրոսյանը նման որոշում է կայացրել: «Այսօրվանից մեր հիմնական լոզունգը լինելու է Սերժ Սարգսյանի անհապաղ հրաժարականը»,- հայտարարել է Տեր- Պետրոսյանը՝ հավելելով, որ պետք է հետեւել Կոնգրեսի որոշմանը եւ պատրաստ լինել ամեն պահի շարունակել շուրջօրյա նստացույցները։

Ըստ առաջին նախագահի` Ազատության հրապարակում գիշերները մոտ հազար մարդ է գիշերել վրաններում, նույնքան էլ` նստարանների վրա: ՀԱԿ առաջնորդը հայտարարել է, որ հաջորդ հանրահավաքը կայանալու է հոկտեմբերի 28-ին: