Օտարերկրյա միջամտությունը դադարեցնելու կոչ

Սիրիայի արտգործնախարար Վալիդ Մուալեմը դիմել է ՄԱԿ-ի Գլխավոր ասամբլեայի անդամ երկրներին` պահանջելով դադարեցնել օտարերկրյա միջամտությունը երկրի գործերին, ինչի հետեւանքով արդեն 6 ամիս է անդադար ցույցեր են կազմակերպվում սիրիական կառավարության դեմ. տեղեկացնում է Associated Press-ը:

«Մենք ափսոսանքով ենք նշում, որ Սիրիայում հակակառավարական զինված խմբավորումների ակտիվությունը չի թուլանում, ընդհակառակը` գնալով աճում է: Այդ խմբավորումների առկայությունը խոսում է օտարերկրյա միջամտության մասին»,- իր ելույթում հայտարարել է նախարարը:

Մուալեմը հավելել է, որ այսօր Սիրիան բարեփոխումների շեմին է, սակայն դրանց անցկացմանը խոչընդոտում են իսլամական արմատականները, որոնք աջակցություն են ստանում արտասահմանից:

Սիրիայի արտգործնախարարը նաեւ խիստ քննադատության է ենթարկել ԱՄՆ-ի եւ Եվրամիության` իրենց դեմ պատժամիջոցներ կիրառելու քաղաքականությունը: Դրանց հետեւանքով, ըստ Մուալեմի, նախագահ Բաշար Ասադի խոստացած ժողովրդավարական բարեփոխումները «զիջում են տեղը այլ առաջնահերթությունների»: