Չինաստանը մի շարք երկրներին կոչ է արել դադարեցնել միջամտությունը Հոնկոնգի գործերին

Չինաստանը կոչ է անում այլ երկրներին՝ անհապաղ դադարեցնել Հոնկոնգի գործերին միջամտությունը. այս մասին հայտարարել է Չինաստանի ԱԳՆ խոսնակ Չժաո Լիցզյանը։

 «Համապատասխան երկրները կոպտորեն միջամտում են Հոնկոնգի գործերին և ՉԺՀ-ի ներքին գործերին, Չինաստանը դատապարտում է դա և իր վճռական բողոքը հայտնում...  Մենք կոչ ենք անում բոլոր համապատասխան երկրներին հարգել Չինաստանի ինքնիշխանությունը և դադարեցնել Հոնկոնգի գործերին միջամտելու ցանկացած փորձը», - նշել է դիվանագետը՝ մեկնաբանելով Մեծ Բրիտանիայի, Ավստրալիայի, Կանադայի և ԱՄՆ-ի Արտաքին գործերի նախարարությունների համատեղ հայտարարությունը:

Ավելի վաղ Միացյալ Թագավորության, Ավստրալիայի, Կանադայի և Միացյալ Նահանգների արտաքին գործերի նախարարության համատեղ հայտարարության մեջ հաղորդվում էր, որ Հոնկոնգի համար ազգային անվտանգության մասին օրենք մշակելու ՉԺՀ իշխանությունների որոշումը հակասում է Բրիտանիայի և Չինաստանի կողմից ստորագրված շրջանի ինքնավարության հռչակման դրույթներին: