Որոշ համայնքներում ընտրությունը չկայացած է ճանաչվել

ԼՂՀ Կենտրոնական ընտրական հանձնաժողովն այսօր հրապարակել է տեղական ինքնակառավարման մարմինների` սեպտեմբերի 18-ին կայացած ընտրությունների արդյունքները։

Ընտրությունների օրը 209 համայնքների հիմնական եւ լրացուցիչ ընտրացուցակներում ընդգրկված 93243 ընտրողներից քվեարկությանը մասնակցել է 54697 ընտրող կամ 58,66%-ը:

Ընտրությունների արդյունքներով հանրապետությունում ընտրվել են 142 համայնքի ղեկավարներ եւ 206 համայնքներում` 1071 ավագանու անդամներ: Հանրապետության որոշ համայնքներում, տարածքային ընտրական հանձնաժողովների որոշումների համաձայն, համայնքի ղեկավարի ընտրությունը չկայացած է ճանաչվել Ասկերանի շրջանի Մադաթաշեն եւ Լուսաձոր, Հադրութի շրջանի Կարմրակուճ, Մարտունու շրջանի Պառավաթումբ, Քաշաթաղի շրջանի Արախիշ եւ Դրախտաձոր համայնքներում, քանի որ միակ թեկնածուն ընտրողների կեսից ավելիի ձայները չի ստացել: