Պետությունների ապագան երեխաների ձեռքերում է

ՀՀ կրթության և գիտության նախարար Արմեն Աշոտյանը երեկ ընդունել է բարեկամական այցով Հայաստանում գտնվող Գերմանիայի Դաշնային Հանրապետության Սաքսոն-Անհալթ երկրամասի Հալլե քաղաքի Յ. Խ. Ռոյեի անվան դպրոցի տնօրենին ու աշակերտներին:

«Վստահ եմ, որ դուք մեր երկրում լավ ընկերներ կգտնենք, և այստեղից ձեզ հետ ջերմ հուշեր ու վառ տպավորություններ կտանեք»,- ասել է նախարարը:

Գերմանացի պատանիներին Հայաստան էր հրավիրել Աշոտյանը` դեռ անցյալ տարվա սեպտեմբերին, երբ Գերմանիա կատարած պաշտոնական այցի շրջանակում այցելել էր նաև Ռոյեի անվան դպրոց, որը համագործակցում է Հայաստանի Սարդարապատ համայնքի դպրոցի հետ:

Մի քանի օր առաջ Հայաստան ժամանած գերմանացի պատանիները նախարարին պատմել են իրենց տպավորությունները` նշելով, որ ՀՀ-ում ապրում են բարեկիրթ ու հյուրընկալ մարդիկ, և իրենք այստեղ լավ են զգում ու անպայման կրկին կգան:

Հույս հայտնելով, որ հայ և գերմանացի պատանիների բարեկամությունը շարունակական կլինի` նախարար Ա. Աշոտյանը նշել է. «Պետությունների ապագան երեխաների ձեռքերում է: Հավատացեք, սիրելի' երեխաներ, Հայաստանի և Գերմանիայի, և ընդհանրապես ցանկացած այլ երկրների միջև բարեկամական կապերի ամրապնդումը կախված է ոչ թե նախարարներից, այլ ձեզանից»:

Նախարարը հավաստիացրել է, որ ՀՀ կրթության և գիտության նախարարությունը պատրաստ է ստեղծել հնարավորություններ, որպեսզի Հայաստանում գերմաներենի ուսուցման ծավալներն ընդլայնվեն: