Ես նաեւ Թուրքիայում ապրող հայերի նախագահն եմ. Աբդուլլահ Գյուլ

Պարզվում է` Թուրքիայի նախագահ Աբդուլլահ Գյուլը ազգային փոքրամասնություններին չի մոռանում: «Ես Թուրքիայում ապրող գերմանացիների, մյուս քրիստոնյաների, հրեաների եւ հայերի նախագահն եմ: Նրանց հետ տոներ եմ նշում ու այցելում նրանց սրբավայրերը: Նրանք ազգային փոքրամասնություններ են, եւ նրանց երբեմն մոռանում են, սակայն ես չեմ մոռանում»,- Գերմանիա կատարելիք այցից առաջ թուրքական Zaman եւ գերմանական Die Zeit թերթերին տված հարցազրույցում ասել է նա` հավելելով, որ Գերմանիայում ապրող թուրքերի նախագահն էլ Քրիստիան Վուլֆն է:

Գյուլը նաեւ հայտարարել է, որ Գերմանիա տեղափոխված թուրքերն աջակցել են երկրի տնտեսությանը, օգնել վերականգնել այն, ապացուցել են, որ կարգապահ են եւ աշխատասեր: «Սակայն Գերմանիայում այդ մասին կարծես մոռացել են»,- դժգոհել է նա` քննադատելով Գերմանիայի խիստ քաղաքականությունը թուրքերին մուտքի արտոնագիր տալու հարցում: