Երեք տղամարդկանց պատմության մասին

Երեկ Եղիշե Չարենցի տուն-թանգարանում տեղի է ունեցել Կարին Հովհաննիսյանի «Գերդաստան ստվերաց» գրքի շնորհանդեսը:

Շնորհանդեսը բացել ու ներկաներին ողջունել է Չարենցի տուն-թանգարանի տնօրեն Լիլիթ Հակոբյանը: Ելույթ են ունեցել Հայաստանի գրողների միության նախագահ Լեւոն Անանյանը, թարգմանիչ Սամվել Մկրտչյանը, հեղինակի հայրը` Րաֆֆի Հովհաննիսյանը, ով գրքի հերոսներից մեկն է: Երեկոն եզրափակել է Կարին Հովհաննիսյանը:

«Գերդաստան Ստվերաց»-ում պատկերված է գերդաստանի երեք սերունդների կյանքը` իրենց ապրած պատմական ժամանակաշրջանի բովում:

Կարինը գրում է. «Իմ գերդաստանի պատմությունը երեք տղամարդկանց պատմության մասին էր, ովքեր լքել էին. սա էր իմ առաջին հայտնաբերությունը: Իմ մեծ պապը լքել էր իր հայրենիքի ավերակները: Իմ պապը լքել էր իր հոր ագարակը: Հայրս լքել էր ամերիկյան կյանքի հրաշալիքները: Իմ գերդաստանի պատմությունն, ըստ իս, անառակ որդոց մասին էր, այսինքն` տղամարդկանց, ովքեր իրենք էին տիրապետել իրենց ճակատագիրը»:

«Գերդաստան ստվերաց»-ը կարելի է ձեռք բերել գրախանութներում:

Գրքի հասույթը կտրամադրվի «Օրրան» բարեգործական կազմակերպությանը: