Սփյուռքի շատ թերթեր տպագրվում են օտար լեզվով

«Սփյուռքի մամուլը գտնվում է շատ վատ վիճակում. Ֆրանսիայում, օրինակ, տպագրվում են հայկական թերթեր` ֆրանսերեն լեզվով: Սա արդեն իսկ լուրջ խնդիր է»,- այսօր լրագրողների հետ հանդիպման ժամանակ նման մտահոգություն է հայտնել «Օրեր» համաեվրոպական ամսագրի գլխավոր խմբագիր Հակոբ Ասատրյանը:

Նա տեղեկացրել է, որ «Օրեր» ամսագիրը լույս է տեսնում 1999 թվականի սեպտեմբերից Պրահայում: Երկամսյա պարբերականը լուսաբանում է ոչ միայն Չեխիայում բնակվող հայերի գործունեությունը, այլեւ անդրադառնում է եվրոպական 30-ից ավելի հայ համայնքների մշակութային, քաղաքական ու հասարակական, մարզական եւ համայնքային կյանքին: Ամսագիրն անդրադառնում է նաեւ Չեխիայում եւ Եվրոպայի այլ երկրներում ապաստան խնդրող հայ փախստականների կյանքին, համագործակցում է Միգրացիայի միջազգային կազմակերպության հետ: