Թբիլիսիում հրապարակայնորեն հայհոյում են հայ մայրերին (տեսանյութ)

ԽՍՀՄ փլուզումից հետո վրացական հասարակությունում պարբերաբար հակահայկական տրամադրությունների ալիքներ են բարձրանում: Վերջին մի քանի ամիսներին զանգվածային բնույթ է ստացել հայերի հանդեպ ատելության քարոզչությունը Վրաց Ուղղափառ եկեղեցու, քաղաքական տարբեր կուսակցությունների և վրաց մտավորականության ներկայացուցիչների կողմից:

Երբ Վրաստանի խորհրդարանն օրենք ընդունեց, որ Վրաստանում գործող կրոնական միավորումներին իրավաբանական կարգավիճակ է տրվում, Վրաց Ուղղափառ եկեղեցին, քաղաքական տարբեր ուժեր սկսեցին ցույցեր կազմակերպել: Նրանց հարձակման հիմնական թիրախը Հայ Առաքելական եկեղեցին է եւ հայությունը: 

Վրաստանում գլուխ են բարձրացրել ազգայնական-շովինիստները: Դրանում կարելի է համոզվել օրինակով. Վրաստանի մի շարք մշակութային, քաղաքական, հոգեւոր գործիչների հայատյաց արտահայտություններից հետո Թբիլիսիում սկսեցին ի հայտ գալ հակահայկական մակագրություններ: Վրաստանի մայրաքաղաք Թբիլիսիի` հայերով խիտ բնակեցված Հավլաբար շրջանում` «Վիննի պոդյոմ» – փողոցում` Վրաստանի նախագահի նստավայր տանող ճանապարհին, շենքերից մեկի պատին հայտնվել է հայ մայրերին անպատվող մակագրությունը` ֆաշիստական սվաստիկայով:

Սա մասնավոր դեպք չէ, այլ անկախության ձեռքբերումից մինչ օրս Վրաստանում իրականացվող խտրական քաղաքականության մաս եւ հետեւանք: