Միջքաղաքային երթուղայինները Երեւանի կենտրոնում չեն կայանի

Երեւանի կենտրոնական հատվածներում մերձքաղաքային ուղևորատար տրանսպորտային միջոցների կայանումն արգելվում է: Դա բխում է մայրաքաղաքի կենտրոնը բեռնաթափելու ծրագրից, որը համատեղ մշակել են Երևանի քաղաքապետարանը, ՀՀ տրանսպորտի և կապի նախարարությունը և ճանապարհային ոստիկանությունը:

Երևան մուտք գործող մերձքաղաքային երթուղիները իրենց վերջին կանգառը հիմնականում պետք է կատարեն քաղաքի ավտոկայաններում կամ քաղաքապետարանի կողմից նախատեսված համապատասխան երթակարգավարական կետերում: Ըստ այդմ` քաղաքապետարանն առաջարկում է, որ Արագածոտնի մարզի կողմից Երևան եկող ուղևորատար տրանսպորտային միջոցները, որոնք շարժվում էին Կիևյան, Բաղրամյան, Պարոնյան, Պռոշյան փողոցներով, այսուհետ կայանեն ոչ թե Պարոնյան փողոցում, այլ Կենտրոնական ավտոկայանում` անցնելով Լենինգրադյան փողոցով, Ծիծեռնակաբերդի և Աթենքի խճուղով:

Արարատի մարզից եկած ուղևորատար տրանսպորտային միջոցների համար (այդ թվում` «Այրարատ» կինոթատրոնի մոտ կայանողների) որպես վերջին կանգառ առաջարկվում է Երկաթուղային կայարանի հարակից հրապարակում հատկացված շուրջ 5.000 քառ. մետր երթակարգավարական տարածքը:

«Այրարատ» կինոթատրոնի մոտ կայանող` Գյումրի, Արթիկ, Ստեփանավան, Վանաձոր, Սպիտակ քաղաքներից եկող տրանսպորտային միջոցների համար, որպես վերջին կանգառ առաջարկվում է Կենտրոնական ավտոկայանը:

Առաջարկվում է, որ Արմավիրի մարզի կողմից մայրաքաղաք եկող և նախկինում Սարյան փողոցում կայանող ուղևորատար տրանսպորտային միջոցները սպասարկման ծառայությունները նույնպես իրականացնեն Կենտրոնական ավտոկայանից:

Մայրաքաղաքի մերձակա հյուսիսային շրջաններից Երևան եկող ուղևորատար տրանսպորտային միջոցների համար վերջին կանգառ է առաջարկվել Հյուսիսային ավտոկայանը:

Երևանի քաղաքապետարանը վստահեցնում է, որ նշված փոփոխությունները որևէ կերպ չեն խոչընդոտի բնակչության պատշաճ սպասարկմանը. տեղեկացնում է քաղաքապետարանի տեղեկատվության և հասարակայնության հետ կապերի վարչությունը: