Նավթն ու գազը Ադրբեջանին չեն փրկի

Ադրբեջանը սխալվում է` կարծելով, թե նավթն ու գազն իրեն կօգնեն հեշտությամբ լուծել Ղարաբաղյան հիմնախնդիրը: «Արեւմտյան աշխարհում ոչ մեկը նրա նավթի ու գազի կարիքը չունի: Մինչեւ հիմա նրանք խաբված են մնում` կարծելով, թե նավթը կօգնի դժվարություններից հեշտությամբ ազատվել»,- այսօր լրագրողների հետ հանդիպման ժամանակ ասաց քաղաքագետ Սերգեյ Շաքարյանցը:

Նա նշեց, որ մեծ տերություններն այժմ փոքր-ինչ այլ կերպ են տրամադրված, եւ Ադրբեջանի մոտեցումները շատ քչերին են դրդում հակահայկական քաղաքականություն վարել:

«Ադրբեջանի հետ դեռ փորձում են դիվանագիտորեն վարվել, փորձում են առանց կոպտելու բանակցել: Բայց Արցախը Ադրբեջանի կազմում թողնելու մասին ոչ մի բանակցություն չի կարող գնալ»,- ասաց Շաքարյանցը:

Անդրադառնալով կազանյան հանդիպման տապալմանը` քաղաքագետը  հայտարարեց, որ դա Ադրբեջանի ոչ կառուցողական դիրքորոշման արդյունքն էր: Չնայած Ստրասբուրգում Սերժ Սարգսյանը հայտարարել էր, թե գնում է Կազան փաստաթուղթ ստորագրելու ակնկալիքով, Ադրբեջանը եկել էր Կազան ոչ թե փաստաթուղթ ստորագրելու, այլ մի քիչ երկարաձգելու իր մահվան պահը: «Մահը տվյալ դեպքում դիվանագիտորեն, պաշտոնապես  ռազմական պարտության հետեւանքները խոստովանելն է` քաղաքական դաշտում: Այդ պահից Ադրբեջանը ցանկանում է ամեն գնով խուսափել»,- մեկնաբանեց նա:

Քաղաքագետը հայ ժողովրդին շնորհավորեց հուլիսի 9-ին Հարավային Սուդանի միջազգային ճանաչման կապակցությամբ, քանի որ այն մեր խնդրին նման նախադեպ է, եւ դա այլեւս ոչ ոք չի կարող ժխտել: